Më datë 8 Dhjetor 2022, në një ceremoni madhështore nga Pallati i Kongreseve, Tirana mbylli vitin si “Kryeqyteti Europian i Rinisë”. Në ceremoninë me të rinjtë në Pallatin e Kongreseve, stafeta për vitin 2023 i kaloi qytetit Lublin në Poloni. Të pranishëm në këtë aktivitet ishin, Kryetari i Bashkisë së Tiranës, Erion Veliaj, Ministrja e Arsimit, Evis Kushi, gjithashtu Tom Matthew, Anëtar Bordi i Forumit Rinor Evropian, Përparim Rama Kryetar i Bashkisë Prishtinë, Omer Bajraktari, Kryetar i Bashkisë së Ulqinit, si dhe Kostantinos Koukas, Kryetar i Bashkisë Mykonos, Greqi.

Dafina Peci, Drejtoreshë e Kongresit Rinor Kombëtar dhe Aspasjana Kongo, Koordinatore e programit “Tirana, Kryeqyteti Evropian i Rinisë”, thanë se ky ishte një vit i është dedikuar vetëm atyre, të rinjve në gjithë Shqipërinë.

“Këtë vit u realizuan mbi 1 mijë aktivitete jo vetëm në Tiranë, por në të gjithë Shqipërinë, pa marrë parasysh se Tirana ishte qyteti që mban stafetën e titullit “Kryeqyteti Europian i të Rinjve”. Kemi siguruar mbështetje financiare për mbi 360 projekte të realizuara në fusha të ndryshme duke nisur që nga nxitja e punësimit, ekonomia dhe inovacioni, diversiteti, pjesëmarrja në vendimmarrje, ngritja e kapaciteteve, të rinjtë janë eurpianë, respektimi i të drejtave të njeriut, shëndeti mendor dhe fizik, sporti, kultura. Ajo që kemi vënë re është interesi i madh i të rinjve shqiptarë për të zhvilluar kapacitetet e tyre, për t’u rrjetëzuar dhe për të qenë në kontakt me njëri-tjetrin, së dyti për të qenë pjesë e politikbërjes dhe vendimmarrjes, pra për të qenë më aktiv, më të përfshirë”,  theksoi në fjalën e saj Dafina Peci.

“Kemi tejkaluar mbi 1 mijë aktivitete. Bazuar në 8 programet kryesore ku kanë qenë 360 përfitues. Kemi pasur edhe 90 iniciativa flamur, ku secila prej tyre ka pasur 3-4 aktivitete. Aktivitetet kanë qenë nga më të ndryshmet por të gjithë aktivitetet që kanë vijuar gjatë gjithë vitit, në kulturë, në sport, në zhvillimin e kapaciteteve, në vlerat evropiane, ka pasur gurin e vet për të krijuar puzzle-n përfundimtar të një viti të suksesshëm dhe gjithëpërfshirës”, u shpreh Aspasjana Kongo, koordinatorja e programit “Tirana, Kryeqyteti Evropian i Rinisë 2022” pranë KRK.

Kryetari i Bashkisë së Tiranës, Erion Veliaj tha se për Tiranën po mbyllet një vit i rëndësishëm dhe se ato që sot janë realizuar me shumë mund e përpjekje janë rezultat i asaj që kemi ëndërruar vite më parë dhe që e kanë kthyer Tiranën dhe gjithë Shqipërinë në qendrën e zhvillimeve europiane.

“Ëndrrat kanë shumë rëndësi. Ne ëndërronim të ishim anëtarë të Këshillit të Sigurimit dhe Shqipëria sot është anëtare e Këshillit të Sigurimit. Ne ëndërronim që një ditë Shqipëria të ishte vendi më i avancuar, një nga vendet që ka bërë më shumë progres, duke menduar prej nga e nisëm dhe ja ku jemi, përpara 2 ditësh, Shqipëria dhe Tirana ishin epiqendra e Europës, shtëpia e madhe e Samitit BE-Ballkani Perëndimor,” u shpreh Veliaj.

Gjatë ceremonisë u shpërndanë çmime për 16 të rinj, histori suksesi që në kuadër të vitit të rinisë, realizuan ëndërrat e tyre më të mëdha. Gjithashtu, në shenjë mirënjohjeje u dhanë çmime edhe për persona që kanë mbështetur Tiranën si “Kryeqyteti Evropian i Rinisë” dhe të rinjtë shqiptarë përgjatë gjithë vitit 2022: Znj. Katia Stathaki – CEO Vodafone Albania; Znj. Linda Dervishaj – Drejtoresha e Çështjeve të Koorporatës dhe PR e Coca-Cola Bottling Shqipëri; Znj. Fiona McCluney – Koordinatore e Zyrës së Kombeve të Bashkuara në Shqipëri; Z. Fabrizio Bucci – Ambasador i Italisë në Shqipëri; Znj. Stine Klapper – Drejtoresha e Friedrich Ebert Stiftung, Tiranë – Drejtor i Konrad Adenauer Stiftung, Tiranë; Z. Klaus Fiessinger – Drejtor i Hanns Seidel Stiftung, Tiranë; Znj. Majlinda Bregu – Sekretare e Përgjithëshme e Këshillit për Bashkëpunim Rajonal; Z. Christian Steiner – Ambasadori i Austrisë në Shqipëri.

Në fund të ceremonisë Tirana i dorëzoi në mënyrë simbolike Çelësin e “Kryeqytetit Evropian të Rinisë” për vitin 2023 Lublinit të Polonisë.

Por pavarësisht punës dhe ceremonisë që lamë pas, ky rrugëtim nuk përfundon këtu.