Nis sezoni i dytë i Akademisë “U4Politics 2.0_Politic’s never been that cool!”, një iniciativë e zhvilluar nga Kongresi Rinor Kombëtar në bashkëpunim të ngushtë me Fondacionin Gjerman Hanns-Seidel-Stiftung. Qëllimi i këtij aktiviteti është që të rinjtë të kenë mundësi të rrisin njohuritë e tyre në diskursin politik dhe mediatik mbi reformat më kryesore në vend, zhvillimet politike, dinamikat e rajonit dhe integrimin në BE, si edhe të angazhohen në debate me ekspertë, aktivistë dhe analistë të rinj.

Akademia “U4Politics 2.0_Politic’s never been that cool!” do të organizohet përgjatë datave 1-2-3 Prill dhe 8-9-10 Prill 2022, në ambientet e Tirana EYC 2022 – Kongresit Rinor Kombëtar.

Në ditën e parë të projektit “U4Politics 2.0_Politic’s never been that cool!” mbajti fjalën znj. Krisela Hackaj, Drejtore Ekzekutive në Institutin për Bashkëpunim dhe Zhvillim. Ajo ndau me pjesëmarrësit njohuri mbi:

Integrimin në Bashkimin Europian, proçesin në të cilin po kalojmë, pengesat dhe si mund të kontribojë shoqëria civile dhe të rinjtë;

Llogaridhënien e politikanëve gjatë procesit të Integrimit në BE;

Ndikimet, ndryshimet e dinamikave, dhe si ndikon standardizimi mbi shoqërinë;

Rëndësinë e bashkëpunimit rajonal në procesin e integrimit në BE.

Në ditën e dytë të projektit “U4Politics 2.0_Politic’s never been that cool!”, z. Neritan Sejamini, Drejtues Shkrimi në Exit.al, do të diskutojë me pjesëmarrësit në lidhje me komunikimin politik dhe mediatik. Gjithashtu z.Selami Xhepa, Doktor i Shkencave Ekonomike në Universitetin e Tiranës, do të diskutojë mbi situatën aktuale ekonomike në Shqipëri, qasjet e ndryshme dhe politikat ekonomike në lidhje me punësimin dhe arsimin. Trajnim vijon ditën e tretë me diskutime mbi inteligjencën emocionale nga znj. Edlira Gjoni, Eksperte Komunikimi dhe Petagoge në Universitetin e Tiranës dhe reflektime mbi informacionet e marra përgjatë Akademisë nga z.Edon Qesari, Politolog dhe ekspert kontenti pranë U 4 Politics 2.0.

Përgjatë trajnimit, znj.Eris Ibershimi, Trajnere dhe Koordinatore e  Programit “Rinia dhe Pjesëmarrja” për Tirana EYC 2022 pranë Kongresit Rinor Kombëtar asistoi profesionistët e rinj mbi tematikat e ndryshme në fokus të trajnimit.

Këtë vit, Akademia vjen në kuadër të titullit “Tirana Kryeqyteti Evropian i Rinisë 2022”. Bashkëpunimi i Kongresit Rinor Kombëtar dhe Fondacionit Gjerman Hanns-Seidel-Stiftung zgjerohet në partneritet me Euronews Albania, duke i ofruar mundësinë të rinjve të përzgjedhur të paraqiten në emisione televizive, si Euro Talks dhe Balkan Talks pas pjesëmarrjes së tyre në akademitë përkatëse.