E shtuna e 25 Marsit e gjen Liqenin e Tiranës të populluar nga të rinj pjesëmarrës të garës KROS.

Në kuadër të programit “Tirana Kryeqyteti Europian i Rinisë 2022 dhe “Tirana Qyteti Europian i Sportit 2023”, me mbështetjen financiare të Kongresit Rinor Kombëtar në bashkëpunim me Bashkinë Tiranë, Federata Shqiptare e Sportit Shkollor realizoi Aktivitetin Sportiv: KROS TEYC, pjesë e projektit “Kampionatet Shkollore të Kryeqytetit 2022’’.

1500 nxënës, 20 Shkolla të Mesme të Tiranës, 80 Mësues Edukimi Fizik (MEF) dhe 35 vullnetarë, ishin pjesë e kësaj gare dhe projekti ku çdo gjimnaz u përfaqësua nga nxënësit dhe mësuesit respektivë.

Koordiantori i Programit “Rinia dhe hapësirat rinore” pranë KRK – TEYC 2022 Bledar Iljazi përgëzoi të rinjtë që iu bashkuan maratonës duke i inkurajuar ata që të shfrytëzojnë hapësirat rinore dhe aktivitetet sportive për një jetesë më të shëndetshme dhe aktive.

Të rinjtë dhe pjesëmarrësit e këtij eventi u përshëndetën edhe nga Nën/Kryetari i Bashkisë Tiranë Z. Andi Seferi i cili përgëzoi të rinjtë mbi angazhimin e tyre në aktivitete sportive dhe theksoi se këtë vit që Tirana mban titullin Qyteti Evropian i Sportit të rinjtë duhet të aktivizohen dhe të jenë nismëtarë të më shumë aktivitete sportive.

Qëllimi i projektit “Kampionatet Shkollore të Kryeqytetit 2022’’  është masivizimi i lëvizjes sportive në shkollë dhe konsolidimi i sistemit sportiv shqiptar për të siguruar mirëqenien dhe aktivizimin e të rinjve në aktivitete sportive.

Gara KROS TEYC u mbështet edhe nga  EMERGENCY RESPONSE ALBANIA – ERA,  të pranishëm me ambulancën e urgjencës, Policia Bashkiake, Eco-Tirana, dhe kompania e ujit Qafshtama.